Kulusuk

Á aðeins 2 klukkustundum er hægt að komast til Grænlands frá Íslandi og heimsækja bæinn Kulusuk.

Ferð á slóðir nágranna okkar í norðri er engu lík. Tröllauknir borgarísjakar lóna úti fyrir þorpinu, þar sem húsin eru svo litskrúðug og virðast mega sín lítils í ógnvekjandi náttúrunni. 

Air Iceland Connect býður einnig dagsferðir til Kulusuk yfir sumartímann, nánar hér

Oneway / Roundtrip

Í Kulusuk sem er í Ammassalik héraði, má enn sjá leifar af gamla grænlenska veiðisamfélaginu. Elstu íbúarnir eru fæddir inn í aldagamlar hefðir, þar sem verklag og lifnaðarhættir höfðu verið þeir sömu um aldaraðir.


Gangan að bænum
Grænlendingar eru miklir gestgjafar og mjög skemmtilegir að heimsækja. Ganga frá flugvellinum tekur um 40 mínútur. Meðfram stígnum milli flugvallarins og þorpsins eru hlaðnir haugar, sem þegar betur er að gáð, eru grafir forfeðranna.

Skortur á jarðvegi gerir það að verkum að grjóti er hlaðið utan um hina látnu til að halda rándýrum, fuglum og öðrum óvinsælum gestum frá.



Gangur lífsins
Nýi kirkjugarðurinn sem stendur eilítið frá þorpinu er ótrúleg sjón í þessu hörkulega landslagi. Plastblóm skreyta leiðin, en engin nöfn eru á hvítum krossunum. Trú Grænlendinga er sú að sálin lifi áfram og því fá nýfædd börn nöfn hinna látnu.

 

Menningararfurinn
Í Kulusuk bjóða heimamenn upp á skemmtidagskrá fyrir ferðamenn þar sem m.a. eru sýndar aðferðir veiðimanna á kayökum, síðan eru sungnir ævagamlir veiðimannasöngvar, sem varðveist hafa í munnlegri geymd.

Að sýningu lokinni má ganga upp að Stórasteini þar sem veiðimenn hafa í aldanna rás farið til að skima eftir bráð sinni. Þar er útsýni gott. Ótrúlega fallegt handverk er hluti af menningararfinum og minjagripir eru geysifallegir.

 

Útbúnaður
Hvenær sem ætlunin er að heimsækja Grænland, hvort sem er um sumar eða vetur, er gott að kynna sér aðstæður áður en haldið er af stað.

 

Upplýsingasíða um ferðalög til Grænlands
Á síðunni finnur þú gagnlegar upplýsingar um allt sem snýr að ferðalagi til Grænlands. T.d. upplýsingar um fatnað, tungumál, gjaldmiðil, verslun, veiðileyfi, samgöngur, frídaga og fleira. Smelltu hér